Ærumeiðandi ummæli hiti í sorpmálunum í Árborg. Þetta er álíka og landsdómur það er ekki mér að kenna.

Föstudagur, 23. mars 2012 18:53

Á fundi bæjarráðs Árborgar fimmtudaginn 22. Mars var m.a. fjallað um úrskurð kærunefndar útboðsmála vegna kæru Gámaþjónustunnar á útboði vegna sorphirðu. Elfa Dögg Þórðardóttir, D-lista, vék af fundi. Sigurður Sigurjónsson, hrl., kom inn á fundinn og fór yfir niðurstöðu kærunefndar.

Eggert Valur Guðmundsson, S-lista, og Helgi S. Haraldsson, B-lista, lögðu fram eftirfarandi bókun vegna úrskurðar kærunefndar útboðsmála vegna sorphirðuútboðs. Það er skoðun undirritaðra bæjarfulltrúa að sú gagnrýni, sem minnihluti bæjarstjórnar hafði í frammi þegar sú ákvörðun var tekin að hafna tilboðum sem bárust vegna sorphirðuútboðs fyrr í vetur, hafi átt fullan rétt á sér og er staðfest í úrskurði kærunefndar útboðsmála. Í úrskurði kærunefndar segir meðal annars „ Það leiðir af meginreglum útboðs og verktakaréttar að kaupandi verður ekki neyddur til að halda áfram útboði og ganga til samninga kjósi hann að hætta við útboð. Hins vegar tekur kaupandi ávallt þá áhættu að verða skaðabótaskyldur gagnvart bjóðendum vegna slíkra ákvarðana.“ Einnig kemur fram í niðurstöðunni eftirfarandi. „Kærunefnd útboðsmála telur ljóst að ákvörðun kærða um að hafna öllum tilboðum hafi hvorki verið byggð á valforsendum útboðsins né því að forsendur útboðsins hafi brostið.“ Var ákvörðun kærða því ólögmæt. Í sjálfum úrskurðarorðum kærunefndar segir. „Það er álit kærunefndar útboðsmála að kærði sé skaðabótaskyldur gagnvart kæranda við að undirbúa tilboð og taka þátt í útboði kærða“. Kærunefndin segir einfaldlega að Sveitarfélagið Árborg hafi brotið lög og sé skaðabótaskylt. Að lokum segir kærunefndin að með hliðsjón af úrslitum málsins verði kærða gert að greiða kæranda 400.000 krónur í kostnað við að hafa kæruna uppi. Það þarf mikið áræði til þess að túlka úrskurð kærunefndarinnar með þeim hætti sem gert var og birt á heimasíðu sveitarfélagsins þegar niðurstaðan lá fyrir“.

Eggert Valur Guðmundsson, bæjarfulltrúi S lista.

Helgi Sigurður Haraldsson, bæjarfulltrúi B lista.

Þórdís Eygló Sigurðardóttir, V-lista, tók undir bókun Eggerts og Helga, að undanskildu því sem segir um heimasíðuna.

Eyþór Arnalds, D-lista, og Ásta Stefánsdóttir, framkvæmdastjóri sveitarfélagsins, lögðu fram eftirfarandi bókun:

„Aðalkröfu kæranda var hafnað. Ekki er venja að birta úrskurði kærunefnda á heimasíðu sveitarfélagsins og ekki var um neina túlkun að ræða“.

Elfa Dögg Þórðardóttir, D-lista, kom inn á fundinn að loknum umræðum um málið. Hún lagði fram eftirfarandi bókun:

„Undirrituð fordæmir þau vinnubrögð sem viðhöfð hafa verið varðandi útboð á sorphirðu í sveitarfélaginu. Allt frá undirbúningi útboðsins og fram til dagsins í dag hefur verk- og lögfræðikostnaður vegna málsins verið mikill sem má rekja til óvandaðra vinnubragða þeirra aðila sem komu að málinu á öllum stigum þess. Þetta á við bæði minnihluta og meirihluta sem komu að gerð útboðsgagna, afgreiðslu málsins á síðari stigum þar sem greinilegt skilningsleysi allra aðila og óljós rökstuðningur fyrir höfnun tilboða leiddi til pólitískra deilna þar sem ærumeiðandi ummæli voru viðhöfð um einstaklinga sem tengjast atvinnulífi sveitarfélagsins. Það er gjörsamlega óviðunandi að heiðarlegt fólk sem gefur kost á sér til starfa fyrir sveitarfélagið skuli ekki geta treyst því að í viðkvæmum málum sé vandað betur til verka til að forðast megi ærumeiðingar og sóun á almannafé“.

Helgi S. Haraldsson, B-lista, lagði fram eftirfarandi bókun:

„Ég vil taka fram að undirritaður kom ekki að gerð útboðsgagna vegna þessa máls og hefur á engan hátt tekið þátt í ærumeiðandi ummælum vegna málsins“.

Þórdís Eygló Sigurðardóttir, V-lista, lagði fram eftirfarandi bókun:

„Ég vil taka fram að ég kom ekki að blaðaskrifum vegna málsins“.

Þetta klúður verður til þess að við fáum vonandi miklu lægra tilboð hvort það nær til að greiða skaðabæturnar veit ég eigi Það er miklu hagstæðara að hirða sorpið eins og það er framkvæmt nú, enda engi ástæða til að drullumalla lífrænan úrgang sem hvergi má nota og ekkert starfsleyfi er fyrir. það má þó keyra á því gasi sem verður til við urðun í Álfsnesi sem er viðurkend endurvinsla.